Categories
糖尿病 醫療資訊

點解早上空腹血糖高?原來係關黎明事

醫生,我明明臨瞓前篤手指的血糖只有5度,但第二朝一起身的空腹血糖有7度?明明成晚冇食過野架?! 如果你想知點解,請看這篇文章!

早上空腹血糖高係好多糖尿病人(過半數)有的現象,呢個我地醫學上叫做黎明效應(唔係唔會空肚食早餐個男神黎明,而係指早上的黎明),英文叫Dawn Phenomenon。

一個糖尿病人一天的血糖值變化。我地假設個人的睡眠時間是在凌晨12點至早上8點。
白天會食早午晚三餐,所以你會見到在早上、中午同晚上會有3段時間血糖特別高。

晚餐食咗的食物被消化吸收後,血糖會慢慢落番,所以凌晨2-4點左右D血糖會係最低的。但人的生理時鐘會在黎明時份(即清晨4-6點左右)叫醒身體的器官唧高血糖素、皮質醇、生長激素呢D會升高血糖的荷爾蒙,令成個身體可以在白天完全運作。

正常人有有效的機制(分泌足夠的胰島素降血糖)去抗衡黎明效應,因此佢地的早上空腹血糖不會比之前一晚睡前的血糖差距太大。

黃色的時段我剛才所說的黎明效應,大家可以睇到呢段時間D血糖升得好快,高過臨瞓前的水平至少 1度(1 mmol/l )。亦因為黎明效應,糖尿人即使早餐吃得唔多,佢早餐後的血糖水平會容易升得好高。

早上空腹血糖高有乜影響?

幾年前有研究指出(參考醫學文章),黎明效應會令糖尿人的糖化血色素HbA1c 增加0.4%。例如本應你個 HbA1c 本應只有6.8%,如果你有明顯的黎明效應,你的HbA1c可增加至7.2% (6.8+0.4 =7.2%)。

有乜方法減低早上空腹血糖高?

可行方法包括:

    1.    唔好只用戒口方法醫糖尿

               因為研究指出比起吃藥打胰島素的糖尿病人,

純戒口醫糖尿病的病人的黎明效應會最明顯

    2.   早D食晚飯,同食會晚飯後做點運動

    3.   減壓、有好的睡眠質素

              可以減低皮質醇; 

亦有數據指出瞓得越差同精神壓力越大,黎明效應越大

有睡眠窒息的人士睡眠質素都會冇咁好,黎明效應明顯

    4.   調節口服藥嘅時間和胰島素的種類

如果本身使用胰島素泵的糖友(通常係一型糖尿患者),

我們會建議在黎明時分開始增加胰島素泵注射嘅份量,

以減低早上空腹嘅血糖升幅。

黎明效應可以在一型、二型糖尿病患者出現,令早上一起床的血糖比睡前的高。

如果你正使用胰島素、或者是磺胺類的口服糖尿藥,咁你仲有一個可能性令早上的血糖高,我會在<血糖低令你早上空肚血糖高>詳談。

Leave a Reply

Your email address will not be published.