哪些情況空肚抽血有必要 ?
咁就要睇下你要驗乜野血。基本上，一個糖尿病病人每3至6個月都要抽血糖、糖化血紅素HbA1c，去睇下佢地整體的糖尿控制達唔達標。
空腹血糖值對醫生來說的參考價值很高，有助我地去調交糖尿藥物，而血脂的三酸甘油脂既水平會好容易受飲食影響，所以做呢兩樣檢查一定要空肚抽血。
咁乜野叫空肚？
即抽血前8至10個小時禁食，但清水可以飲的，因為水係唔會影響血糖同三酸甘油脂，實在唔洗咁辛苦水都唔飲、乾著口嚨來抽血。
重點：主要係血糖同血脂要抽血前禁食，可飲清水（唔係其他帶糖的飲品：奶茶、咖啡、可樂）
哪些情況空肚抽血冇必要 ?
大部分血液檢查係唔使空肚的：例如糖尿病例行驗血（肝腎功能、血常規），甚至糖化血紅素（HbA1c)，抽血前進食根本冇影響，所以係唔洗禁食嘅。既然唔空肚抽血，大家就唔好一窩蜂在9點正同人迫去抽血，尤其是喺一D人多的化驗所同診所，你真係可能要等成個鐘。有得揀／識揀一定揀其他時間抽血，唔使迫，唔使等咁耐。
不過有少部分血液檢查就算不用空肚抽血，都要在朝頭早抽血，常見的有各種荷爾蒙（皮質醇、雄性激素、催乳激素），因為佢哋上晝和下晝的水平可以有較大的差別，醫生通常會用上晝的讀數作診斷。
最後，大家離開診所前，不妨多口問句你的醫生，睇吓你下一次覆診前的抽血檢查是否需要空肚，咁就唔使估估下，同埋白空肚一場。