每次覆診糖尿病之前，醫生一定會叫糖友們抽啲血去驗。相信好多人會有疑問：其實點解要抽血呢？明明屋企都有勤勤力力篤手指驗血糖，點解醫生仲叫我抽血？個醫生有冇呃我架，次次都驗咁多嘢？
其實大家到底係抽乜嘢血同埋其原因？

假設你每3個月見一次醫生

每次覆診都要驗的抽血項目：

1. 空腹血糖（Fasting Glucose)

可對你的糖尿控制有初步了解，同埋可以間接睇下你在屋企篤手指驗血糖準唔準。

2. 糖化血色素(Glycated Haemoglobin, 簡寫HbA1c)

雖然屋企篤手指驗血糖都可以略知一二，不過呢個糖化血色素有如股票中的50天線，比到醫生一個宏觀印象，反映出你過去3個月的血糖平均控制成點；加上你自己平時監測血糖的數據，讓醫生精準咁同你調校藥物。

間中驗下的抽血項目

1. 血脂（Lipid profile / LDL-cholesterol / HDL-cholesterol)

通常驗血脂包括總膽固醇、好膽固醇（High density lipoprotein cholesterol/ HDL-cholesterol)丶壞膽固醇同埋三酸甘油脂。保持血脂在理想水平（如壞膽固醇越低越好）對於減低各類糖尿病併發症的風險非常緊要，所以你的醫生會好關心你的血脂水平。

如果你食緊降膽固醇藥，而之前血脂的控制都幾好，那只要半年左右驗下都OK。

以下呢D情況就要驗密少少：

1）醫生正在調較你的降膽固醇藥

2）之前血脂控制好唔理想，咁梗係睇緊D

3）剛剛開始食降膽固醇藥，要睇下效果理唔理想

如果你好後生/血脂指數極佳又唔使食藥，醫生可能成1年先同你驗一次血脂都冇問題。

2. 腎功能( Renal Function Test, 簡寫RFT)

測試包括肌酸酐Creatinine, 鈉Sodium 和鉀 Potassium。糖尿病有機會影響腎臟功能，所以間唔時（如半年一年）驗下腎功能，及早發現問題。有D情況你需要再密D驗腎功能：

1）本身已有腎功能減退（如肌酸酐Creatinine 大於150 umol/l)

2）本身個鉀質偏高，因為鉀質過高（如＞6.0mmol/l)會有生命危險

3）剛開始服用ACEI 或 ARB類的血壓藥

本身該類藥物對糖尿腎病有益，但如果身體同隻藥唔夾，反而有機會令鉀質提高。所以醫生會請你在服藥後2星期內再抽血驗腎功能

1.血常規(Complete Blood Count, 簡寫CBC)

我們主要想睇下有冇貧血；糖尿病友比較多人有貧血，例如因為糖尿腎病/維他命B12缺乏症/缺鐵性貧血，導致精神體力欠佳。

2.肝功能

肥胖的糖尿病患者較易有脂肪肝，有時會引致肝酵素稍高；仲有如果肝酵素太高，某D口服糖尿藥同降膽固醇藥就唔適合服用。

3.維他命B12

常見的口服藥物甲福明Metformin有機會減低腸胃道對維他命B12的吸收，嚴重個案可引致神經病變同腦退化；如及早發現，維他命B12缺乏症的治療係非常簡單同有效。所以我通常會叫病人每1-2年驗下維他命B12的水平。

當然醫生會因應每一個病人嘅個案去調節抽血項目同抽血的密度，以上我講的只作大家參考。如果你對於抽血項目有任何疑問，真係唔好怕醜即場問醫生，相信大部分醫生都唔介意講多2句解釋俾你聽。

又係呢句：糖尿病好依賴病人本身的積極參與治療，要參與，明白個病同佢相關資訊係非常重要，所以真係有乜唔明就問醫生。