Categories
糖尿病 醫療資訊

糖尿病管理:點叫血糖達標?

講到糖尿病,一定係要好好控制好血糖,血糖控制好,將來自然少啲有糖尿病併發症嘅風險。血糖達標定義人人不同!我們會用一籃子因素去決定…

講到糖尿病,一定係要好好控制好血糖,血糖控制好,將來自然少啲有糖尿病併發症嘅風險。

血糖達標有效減低微血管併發症

微血管併發症包括糖尿眼、糖尿腎病同埋糖神經病變,佢地係同你的血糖控制有直接關係,例如你之前血糖控制理想,呢D微血管併發症會較少出現,反之亦然。至於大血管的問題(如心臟病、中風)雖然同血糖控制的關係冇微血管咁大,但血糖控制得宜,長遠亦對心臟大腦嘅血管健康有好處。

呢幅咁學術研究的圖表我都想同大家分享。
UKPDS 是一個在糖尿界享負成名、劃時代的硏究,佢其中一個重要發現就係量化糖友血糖控制的益處。如圖所示,糖化血色素每下降1%(如由8.3%下降至7.3%),糖友將來中微血管問題的風險(relative risk)會減37%,同埋將死亡風險減21%!

血糖達標定義人人不同!

我通常會依每位糖友的個別情況去為佢定下血糖目標,唔會一刀切。

對於大部分二型糖尿病患者,我會用以下作為目標:

1. 糖化血色素(HbA1c): <7%
2. 空腹血糖少過7 mmol/l, 飯後兩小時後*血糖唔多於10mmol/l

* 飯後兩小時後 = 第一啖食物開始計起

如果你年紀輕(我的年紀輕定義=少過60歳,冇資格攞樂悠卡的朋友)、糖尿病史短、而服用的糖尿藥冇乜副作用、身體健康亦不錯,我會對你嚴格D:

  1. 糖化血色素HbA1c 要少於6.5%
  2. 血糖「5678」:即係空腹血糖大約5-6 mmol/l, 飯後兩小時後血糖大約7-8 mmol/l. 呢個數字完全達到中庸之道,唔會矯枉過正出現低血糖症情況。

因為呢班人的平均壽命都有80歲以上,所以血糖控制嚴格D,將來10-20年後你仲有健康的身體去享受人生。

如果你係準備懷孕的女士,那醫生會對你特別嚴格,務求你真係懷孕嗰陣順順利利,生個BB又靚又健康!

  1. 糖化血色素HbA1c 越低越好
  2. 血糖接近冇糖尿的水平

嘩,丁醫生,我媽媽已經成80歲人,係咪重要糖尿控制得咁緊?

當然唔係啦!對於身體多病痛、或年紀好大的糖友,我哋「血糖達標」的定義會鬆好多:

  1. 糖化血色素HbA1c 7.5% -8%左右已叫「做到100分」。
  2. 空肚血糖大約6-8mmol/l, 餐後2小時大約10-11 mmol/l左右我都接受

但如果位媽媽仍係名「美魔女」,人又精靈身體又好,我會歸佢為「大部分病人」系列,糖尿達標個定義會嚴謹啲。

最後,如果患者本身已有多種長期病纏身又年事已高的糖尿病患者(講得白啲就係今日唔知聽日事),我們的底線會退後好多:

1. 唔再一味追求HbA1c 目標

2. 糖友唔好因糖尿藥物搞到血糖過低,血糖唔好大上大落得太大,同埋血糖唔好高到離晒譜要入醫院處理就可以

大部分糖友的糖化血紅素HbA1c 目標少於7%已可,少部分人要求低D也可 ,如果年青力壯或孕媽媽我們的要求就要高一點啦

血糖達標係糖尿病管理學中其中重要的一環,而達標的定義在不同糖尿病患者在不同的人生階段也未必一樣,所以各位糖友記得要同你嘅糖醫生傾一傾你的個人目標,長遠就可以減低糖尿併發症嘅風險,加油!

Leave a Reply

Your email address will not be published.